Bókaútgáfan Hólar

Molar
- 12/01/2022
  Anna Kristine látin (#)
  Anna Kristine Magnúsdóttir Mikulcákova lést nú í ársbyrjun. Bókaútgáfan Hólar gaf út tveir bækur eftir Önnu, Milli mjalta og messu, sem byggði á samnefndum og vinsælum útvarpsþáttum hennar, og Með létt skap og liðugan talanda, sem er ævisaga Möggu í Dalsmynni. Báðar bækurnar nutu vinsælda, enda var Anna fundvís á viðmælendur og kunni þá list að leita eftir því markverða og segja þá sögu vel og heiðarlega. Blessuð sé minning Önnu Kristine.
- 26/12/2021
  Fugladagbókin 2022 (#)
  Margir hafa þann skemmtilega sið að skrá hjá sér eitt og annað í dagbækur. Senn lýkur þessu ári og því viljum við Hólamenn minna á Fugladagbókina 2022, sem er í rauninni miklu meira en hefðbundin dagbók. Þar er að finna fróðleik um 52 fugla - einn fyrir hverja viku, marga svokallaða flækinga hér á landi, auk glæsilegra mynda af þeim. Fyrir fuglaáhugafólk er tilvalið að punkta hjá sér ýmislegt í bókina varðandi fugla, s.s. hvenær þessi fugl sást og þá hvar. Svo má vitaskuld nota dagbókina eins og hverja aðra og punkta hjá sér hvaðeina sem gott er að eiga skráð. Bókin er mjög hentug og t.d. fyrir fuglaáhugamenn má nefna að hún fer einkar vel í tösku. Því er tilvalið að grípa hana með sér í fuglaskoðun.
  
  Fugladagbókin 2022, sem er eftir Sigurð Ægisson, er sannkölluð gersemi á meðal dagbóka!
- 03/10/2021
  Instagram (#)
  Bókaútgáfan Hólar er mætt á Instagram. Þú finnur hana undir bokautgafan_holar. Endilega skelltu í "add" og fylgstu með skemmtilegum innslögum!
- 18/04/2021
  Papa Jazz allur (#)
  Um miðjan þennan mánuð lést Guðmundur Steingrimsson - Papa Jazz. Hann var afar snjall trommuleikari og einn af brautryðjendum djassins hér á landi; lék með fjölda hljómsveita og kenndi ýmsum þá list sem vandaður trommuleikur er.
  
  Árið 2009 kom út hjá Bókaútgáfunni Hólum ævisaga Guðmundar og ber hún einfaldlega heitið Papa Jazz. Það var Árni Matthíasson sem skráði og má fullyrða hér og nú að samvinna þeirra félaga hafi orðið til þess að margvíslegur fróðleikur um tónlistarlífið á Íslandi varðveitist um ókomin ár og þá ekki síst það sem snýr að jazzinum.
  
  Undirritaður kynntist Guðmundi vel á þessum árum og ræddum við um heima og geima, meira að segja um knattspyrnu, en Papa Jazz var stuðningsmaður Leeds og fylgdist ágætlega með boltasparkinu. Þess utan var hann mikill sögubrunnur um menn og málefni og var virkilega gaman að hlusta á hann segja frá. Hann kunni óteljandi sögur, fæstar máttu auðvitað fara eitthvað lengra, en hann sagði þær og aðrar einnig af slíkri snilld að unun var af.
  
  Blessuð sé minning Papa Jazz.
  
  Guðjón Ingi Eiríksson.
- 10/04/2021
  (#)
  Svenni látinn
  
  Í dag er til moldar borinn gamall nágranni minn frá Eskifirði, Sveinn Sigurbjarnarson, rútubílstjóri, ferðafrömuður, ævintýramaður og ég veit ekki hvað og hvað. Hann var einstakur maður á margan hátt og því þótti mér mikill fengur í því þegar hann féllst á það að leyfa mér að gefa út ævisögu sína. Það tók samt nokkur samtöl, en bókin heitir ÞAÐ REDDAST, kom út árið 2010 og er skráð af Ingu Rósu Þórðardóttur, sem því miður kvaddi þennan heim nokkrum árum síðar eftir baráttu við sama vágest og Svenni þurfti að lúta í gras fyrir, bölvað krabbameinið.
  
  Skemmst er frá því að segja að bókin rokseldist og þá ekki síst á Austurlandi þar sem Svenni var gríðarlega mikils metinn og ekki af ástæðulausu. Seinna sagði hann mér að einn af kunningjum hans hefði fengið átta eintök af henni í jólagjöf og annar þrjú eintök. Hinn síðarnefndi hefði lesið þau öll og fundist það síðasta best!
  
  Ég sendi öllum ættingjum Sveins Sigurbjarnarsonar samúðarkveðjur um leið og ég þakka honum fyrir fjölmargar rútuferðir í kringum íþróttir og skóla - svo og ekki síst vegna bókarinnar sem mun vafalítið halda nafni hans lengi á lofti.
  
  Guðjón Ingi Eiríksson
- 04/02/2021
  Ljóðasafn Hjálmars Freysteinssonar (#)
  Í maí næstkomandi verður gefið út úrval ljóða og lausavísna eftir Hjálmar Freysteinsson. Hann fæddist 18. maí 1943 og lést 6. febrúar 2020 og starfaði sem heimilislæknir, lengst af á Akureyri. Hjálmar var landsþekktur fyrir snjallar vísur. Hann var allra manna fundvísastur á þær hliðar á málum sem vöktu kátínu, gat alltaf séð það spaugilega, aldrei rætinn eða klúr, bara skemmtilegur.
  
  Það er Bókaútgáfan Hólar sem gefa mun bókina út, en Ragnar Ingi Aðalsteinsson og Höskuldur Þráinsson munu búa hana til prentunar. Í bókinni, sem áætlað er að verði um 200 blaðsíður, verður Tabula Memorialis og þar verða nöfn þeirra sem vilja votta lækninum og hagyrðingnum, Hjálmari Freysteinssyni, virðingu sína, skráð (nema viðkomandi kjósi ekki nafnbirtingu), en forkaupsverð hennar verður kr. 6.980- (innifalið er bæði sendingargjald og virðisaukaskattur). Áhugasamir kaupendur eru beðnir að senda nafn sitt, heimilisfang og kennitölu á netfangið holar@holabok.is (eða hringja í síma 692-8508 eftir klukkan 16 á daginn) og verða þá greiðslupplýsingar sendar til baka.
  
  Það verður enginn svikinn af þessari bók, svo mikið er víst.
Hólar á Facebook
Póstlistaskráning
Leita á þessari síðu

Hrafninn – þjóðin, sagan, þjóðtrúin

Útgáfuár: 2022

Saga hrafnsins með íslensku þjóðinni nær samkvæmt rituðum heimildum allt aftur til 9. aldar, þegar hann leiddi Flóka Vilgerðarson – Hrafna-Flóka – upp að Íslandsströndum. Ýmislegt fréttist af þessum blakka spekingi eftir það, löngum tengdist hann myrkravöldunum, var til dæmis sagður iðulega á flugi við inngang Vítis, sem átti að vera í þeirri eldspúandi Heklu, og ekki var laust við að galdramenn notuðu parta úr búki hans í kukli sínu. En hann átti sér líka marga vini á fyrri tíð, sem gaukuðu að honum matarbita í vetrarhörkum og elskuðu hann og dáðu. Á því hefur engin breyting orðið.

Krummi er sagður vita lengra nefi sínu. Vísindin telja hann reyndar á meðal gáfuðustu dýra sem þessa reikistjörnu byggja. Hann er eftirherma mikil og þjóðtrúin segir hann aukinheldur geta orðið 900 ára. Það er ekki lítið.

Í þessari bók er hrafninn skoðaður frá mörgum hliðum og víða leitað fanga og niðurstaðan er sú, að hann er engum líkur.

Fjöldi glæstra mynda eru í bókinni.

Leiðbeinandi verð: 12.480-.

Efnisflokkun: Bækur, Fuglar, Handbækur og bækur almenns eðlis, Íslenskur fróðleikur, Ljóð og listir, Náttúrufræði, Sagnfræði

Líkið er fundið – sagnasamtíningur af Jökuldal

Útgáfuár: 2022

Sigurður Aðalsteinsson frá Vaðbrekku sér „draug“. Kolbeinn Arason flýgur með lík. Gunnar á Fossvöllum fullyrðir að Akureyrardeildin í Helvíti sé full. Þuríður Hallgrímsdóttir á Brú fær bréf frá hatursmanni sínum. Jón í Möðrudal auglýsir eftir ráðskonu. Séra Sigurjón Jónsson býr til nýtt Faðirvor. Reiðhestur úr Hrafnkelsdal stendur á haus inni við Kárahnjúka. Baldur Pálsson frá Aðalbóli segir frá eðlisfræðitilraunum og Haukur á Hauksstöðum fer sér til hressingar á Heilsuhælið í Hveragerði en fær þá óvænt skeyti frá Hákoni Aðalsteinssyni.

Í þessari bók er ógrynni skemmtilegra sagna og vísna, enda eru Jökuldælingar þekktir fyrir létta lund langt aftur í ættir og leyfa nú öðrum að njóta þess með sér.

Leiðbeinandi verð: 6.580-.

Efnisflokkun: Austurland, Bækur, Gamansögur, Handbækur og bækur almenns eðlis, Íslenskur fróðleikur, Ljóð og listir

Stundum verða stökur til

Útgáfuár: 2022

Bragsnillingurinn Hjálmar Jónsson fer hér á kostum í leiftrandi kveðskap og frásögnum. Skemmtileg atvik og viðburðir verða ljóslifandi og samskipti við fólk í gleði og gáska kitla hláturtaugarnar svo um munar. Einnig er í bókinni dýpri kveðskapur. Rauði þráðurinn er þó alltaf hjartahlýjan og húmorinn.

Leiðbeinandi verð: 6.980-.

Efnisflokkun: Bækur, Ljóð og listir, Skagafjörður

Bland í poka

Útgáfuár: 2022

Páll Jónasson frá Hlíð á Langanesi hefur verið afkastamikið ljóðskáld á undanförnum árum og nægir þar að nefna hinar vinsælu vísnagátubækur hans, þrjár að tölu. Hér kveður hins vegar við annan tón. Um er að ræða ljóð hans og lausavísur og er víða komið við. Íslenskt mál hefur ávallt verið honum hugleikið og bera bækur hans þess vitni. Bland í poka er þar ekki undanskilin.

Leiðbeinandi verð: 2.680-.

Efnisflokkun: Bækur, Ljóð og listir

Ekki var það illa meint – Ljóð og lausavísur eftir Hjálmar Freysteinsson

Útgáfuár: 2021

Mývetningurinn Hjálmar Freysteinsson (1943-2020), lengi heimilislæknir á Akureyri, var fyrst og fremst skáld hlátursins og gleðinnar. Hann hafði frá fyrstu tíð lag á að sjá hliðar á málum sem aðrir sáu ekki og draga fram sjónarhorn sem kom hressilega á óvart.

Í þessari bók eru 700 lausavísur eftir Hjálmar og um 40 kvæði. Auk þess nótur að tveimur lögum sem hafa verið samin við ljóð eftir hann.

Leiðbeinandi verð: 7.480-.

Efnisflokkun: Bækur, Ljóð og listir

Látra-Björg

Útgáfuár: 2020

Látra-Björg (1716-1784), kraftaskáld, sjómaður, flökkukona – goðsögn í lifanda lífi og ráðgáta eftir að hún lést á vergangi í Móðuharðindunum. Samtíðarmenn hennar óttuðust hana. Með kvæðum sínum var hún sögð geta flutt til fjöll, laðað að sér fisk og deytt menn eða fært þeim gæfu.

Í þessari bók eru saman komin öll helstu kvæði Látra-Bjargar og um leið skýringar Helga Jónssonar frá Þverá í Dalsmynni og samantekt hans á æviferli hennar, en Helgi var einhver dularfyllsti rithöfundur Íslandssögunnar.

Í sérstökum viðauka er svo að finna Látrabréfið sem líkur eru á að sé eini varðveitti prósatextinn eftir Látra-Björgu, einhver kynngimagnaðasti orðagaldur sem um getur, sagður hafa fundist á skemmuvegg á Látrum árið 1740.

Leiðbeinandi verð: 5.780-.

Efnisflokkun: Ævisögur og endurminningar, Bækur, Ljóð og listir

Döggslóð í grasi

Útgáfuár: 2019

Þingeyingurinn Kristbjörg Freydís Steingrímsdóttir, höfundur ljóðabókarinnar Döggslóð í grasi, ólst upp við ljóða- og vísnagerð en fékkst lítið við þá iðju sjálf fyrr en eftir fertugt. Kveðskapur hennar varð til í dagsins önn, kannski hripað brot og brot aftan á umslög eða aðra blaðsnepla. Hún hefur einstaklega góð tök á íslensku máli og hafa ljóð eftir hana birst í blöðum og safnritum.

Þessi bók geymir brot af gullfallegum ljóðum Kristbjargar og smellnum lausavísum.

Leiðbeinandi verð: 3.480-.

Efnisflokkun: Bækur, Ljóð og listir

130 vísnagátur

Útgáfuár: 2018

Í þessari bráðsmellnu bók eru 130 vísnagátur, sumar léttar, aðrar erfiðari, en allar eru þær skemmtilegar. Hver vísa felur í sér eitt orð og eru vísbendingar um það að finna í hverri ljóðlínu. Dæmi:

Þessar hýsir herra mús,

hún í tönn er mesti blús.

Lítil, hrörleg íbúð er,

og í götu því er ver.

Já, hvaða orð skyldi leynast þarna?

Leiðbeinandi verð: 2.980-.

Efnisflokkun: Bækur, Gátubækur, Íslenskur fróðleikur, Ljóð og listir

Á mörkunum

Útgáfuár: 2017

Á mörkunum, eftir Sigurð Óttar Jónsson, rafvirkjameistara frá Smáragrund á Jökuldal, hefur að geyma sjötíu og fimm hringhendur. Margar af vísum hans hafa orðið fleygar. Sem hagyrðingur má segja að hann sé þekktur fyrir tvennt; að yrkja fáar vísur og góðar. Bókinni fylgir eftirmáli sem er fræðileg samantekt á hringhenduforminu, uppruna þess og þróun. Það er Ragnar Ingi Aðalsteinsson sem hefur tekið það efni saman. Útgáfudagur bókarinnar var 24. maí næstkomandi, en þann dag varð Sigurður Óttar sjötíu og fimm ára.