Endurprentanir!

Þrír af titlum Bókaútgáfunnar Hóla hafa verið endurprentaðir eða eru á leið í endurprentun.  Glettur og gamanmál, eftir Villa á Brekku, er komin í 2. prentun og rýkur út og sama má segja um bók Magnúsar Þórs Hafsteinssonar, Návígi á norðurslóðum.  Þá er von á 2. prentun af Skagfirskum skemmtisögum 2 – Meira fjör – enda hverfur upp úr nokkrum kössum á hverjum degi, svo mikið er hún pöntuð.  Þá hafa Vísnagátur, eftir Pál Jónasson í Hlíð á Langanesi, Lán í óláni, eftir Hjálmar Freysteinsson, lækni á Akureyri, og Pétrísk-íslensk orðabók, eftir séra Pétur Þorsteinsson, runnið mjög vel út. Ennfremur hefur bókin Skórnir sem breyttu heiminum, eftir skódrottninguna Hönnu Guðnýju Ottósdóttur, tekið mikinn kipp að undanförnu enda frábær bók þar á ferð – allt í senn: fræðandi, skemmtileg og falleg.

Snæblóm

Smásagnasafn það sem hér birtist á bók var nær fullbúið til útgáfu þegar Guðmundur L. Friðfinnsson lést, síðla árs 2004. Hið knappa smásöguform lætur höfundinum prýðilega og skilar vel vinsælum höfundareinkennum hans. Hann er næmur á blæbrigði lífsins í öllum þess fjölbreytileika. Mannlýsingar eru eftirminnilegar, atburðir og átök og víða bregður fyrir léttri kímni en alvaran er gjarnan djúp undir niðri.

Leiðbeinandi verð: 3.980-.

Uppseld.

Vinningshafi!

Vinningshafinn í spurningaleiknum um það frá hverjum séra Pétur Þorsteinsson hafi fengið lánað hárgreiðslurnar sem prýða prestinn framan á nýjustu bók hans, Pétrísk-íslensk orðabók, er Aðalbjörg Rún Ásgeirsdóttir, Stóru-Mörk 3, 861 Hvolsvelli og fær hún senda umrædda bók.  Hárgreiðslurnar tilheyra: Justin Bieber, Jóni Gnarr og Barack Obama.

Bókaútgáfan Hólar þakkar öllum þeim sem sendu inn lausnir – flest allar voru þær HÁRréttar.

Návígi á norðurslóðum – Íshafsskipalestirnar og ófriðurinn 1942-1945

Adolf Hitler leit svo á að norðurslóðir væru örlagasvæði seinni heimsstyrjaldarinnar. Hann óttaðist innrás í Noreg frá Íslandi. Stórveldin léku flókna refskák þar sem saman fóru njósnir, blekkingar og blóðugur hernaður. Litlu munaði að Churchill, Roosevelt og Stalín hittust til fyrsta leiðtogafundar síns í Hvalfirði. Miklir skipalestaflutningar fóru sem fyrr um hafsvæðin við Ísland. Rauði herinn fékk það sem til þurfti svo sigra mætti heri nasista. Austur-Evrópa féll í hendur Stalíns og félaga hans. Sovétríkin héldu velli.

Siglingum Íshafsskipalestanna fylgdu hatrammar orrustur Bandamanna við herskip og kafbáta Þjóðverja auk árása á Noreg. Stærstu herskipum Þjóðverja var að lokum eytt í einum mestu flotaaðgerðum sögunnar. Þjóðverjar brenndu niður byggðir Norður-Noregs og hröktu íbúana brott.

Lega Íslands skipti höfuðmáli í þessum ofsafengnu átökum þar sem allt var lagt undir í baráttu um flutningaleiðir og aðgengi að auðlindum. Valdahlutföll á norðurslóðum gerbreyttust. Kalda stríðið hófst.

Bókin er sjálfstætt framhald Dauðans í Dumbshafi (2011). Sú bók hlaut mjög góðar viðtökur lesenda og einróma lof gagnrýnenda. Návígi á norðurslóðum er sneisafull af upplýsingum um ótrúlega atburði sem gerðust í næsta nágrenni Íslands á mestu örlagatímum í sögu mannkyns en hafa ekki komið fram á íslensku fyrr en nú.

Með þessari bók lýkur höfundur ritun sinni á sögu norðurslóðastríðsins á árum seinni heimsstyrjaldar. Báðar bækurnar varpa nýjum skilningi á sögu seinni heimsstyrjaldar. Þær eru  ómissandi öllu áhugafólki um sagnfræði, stjórnmál og æsispennandi viðburði.

Brot úr bókinni má sjá hér að neðan.

[issuu width=530 height=350 embedBackground=%23940f0f shareMenuEnabled=false backgroundColor=%23222222 documentId=121106001941-1d1623641e9447a19a688b1d0bbaefb3 name=navigi-issuu username=magnusthor tag=arctic unit=px v=2]

Leiðbeinandi verð: 7.480-.

Uppseld.

Skagfirskar skemmtisögur 2 – Meira fjör!

Skagfirskar skemmtisögur fóru á metsölulista bókaverslana fyrir síðustu jól og fengu ekki aðeins frábærar viðtökur í Skagafirði heldur um land allt. Skemmtisögurnar er víða að finna í Skagafirði og nú koma yfir 200 til viðbótar sem Björn Jóhann Björnsson, Skagfirðingur og blaðamaður á Morgunblaðinu, tók saman öðru sinni.

Hér er húmoristum frá Hofsósi og nærsveitum gerð mjög góð skil, sem og Króksurum, Lýtingum og Blöndhlíðingum, auk fleiri sagna af klerkum í Skagafirði. Nýjum og stórskemmtilegum persónum bregður fyrir, lifandi sem gengnum, eins og Jóhönnu Sigríði Sigurðardóttur, fv. prestsfrú á Miklabæ og móður Péturs Jóhanns Sigfússonar grínista. Einnig koma aftur við sögu kunnir kappar á borð við Álftagerðisbræður, séra Hjálmar Jónsson, Gísla Einarsson sjónvarpsmann, Guttorm Óskarsson framsóknarmann, Friðrik bónda á Svaðastöðum og Hvata á Stöðinni.

Í bókinni eru meðal annars sögur af því þegar…

… lundalúsin í Drangey skreið upp fótleggi Karls biskups.

… Óskar frá Álftagerði borgaði kennaranum mismuninn á bókfærsluprófinu.

… Gísli Einarsson mætti alblóðugur á kaupfélagsfund á Króknum.

… húsmóðir á Króknum bannaði Gísla Halldórssyni leikara að syngja Hamraborgina.

… Guttormur árið 1973 sá Ólaf Ragnar Grímsson fyrir sér sem framtíðarmann í stjórnmálum.

… Pétur Jóhann bað móður sína að kyssa sig í miðri messu í Miklabæjarkirkju.

… afi og alnafni Jónasar ritstjóra vildi láta Skagfirðinga hafa hægðir minnst þrisvar á dag.

… skipverjar á Drangeynni flugu til Grímseyjar eftir blandinu.

… danski apótekarinn Ole Bang var beðinn að skila handritunum heim.

… Kristmundur á Sjávarborg fagnaði of snemma andláti Enid Blyton.

… Erling Örn kaupmaður fór í kvöldskóla og vildi bæta þýðingar Helga Hálfdánar á Shakespeare.

Leiðbeinandi verð: 2.980-.

Skórnir sem breyttu heiminum

Þetta er skvísubókin í ár. Hvaða skór henta vel á ströndinni? Af hverju heita loðnu stígvélin Ugg? Hvernig tengist lögreglumaður í London upphafi strigaskónna? Hvaða skór hafa í gegnum tíðina verið tengdir við hippa og grænmetisætur?  Hver er konungur pinnahælanna?  Hvernig á að velja hælinn? Af hverju ætti ekki að máta skó fyrr en í lok dags?

Höfundur bókarinnar, Hanna Guðný Ottósdóttir, kennari, ballernína og spinninþjálfari, er skófrík frá blautu barnsbeini og leyfir hér öðrum að líta yfir og lesa um það besta og flottasta á þessum vettvangi.

Leiðbeinandi verð: 4.780-.

Uppseld.

Hver á hárið?

Jólabókaflóðið

Jólabókaflóð Bókaútgáfunnar Hóla er hafið.  Hver titillinn af öðrum streymir nú út úr prentvélunum: bráðskemmtilegt vísnakver Hjálmars læknis Freysteinssonar, Lán í óláni, fræðandi og ekki síður skemmtilega bók eftir Pál Jónasson, Vísnaþrautir, Glettur og gamanmál eftir Vilhjálm Hjálmarsson á Brekku, Pétrísk-íslensk orðabók, eftir séra Pétur Þorsteinsson, KenKen-talnaþrautir 1 og 2, Bestu barnabrandarana-alveg milljón og Spurningabókin 2012.  Áður eru komnar út þrekvirkið Handknattleiksbókin I-II, eftir Steinar J. Lúðvíksson, og metsölubókin Dauðinn í Dumbshafi, eftir Magnús Þór Hafsteinsson, í kilju.  Þær bækur sem eiga eftir að koma út á þessu ári hjá Hólum eru: Návígi á Norðurslóðum, eftir Magnús Þór Hafsteinsson, en hún er framhald Dauðans í Dumbshafi, Skórnir sem breyttu heiminum, eftir Hönnu Guðnýju Ottósdóttur, Skagfirskar skemmtisögur 2-meira fjör, eftir Björn Jóhann Björnsson, og Amal, sem er ævisaga Amal Tamimi, skráð af Kristjönu Guðbrandsdóttur.

Spurningabókin 2012

Hvaða dag þykir við hæfi að skrökva? Af hverju borðuðu risaeðlur ekki gras? Hvernig er fyrsta ljóðlínan í laginu Kletturinn eftir Mugison? Hver er þriðja reikisstjarnan frá sólu? Hvað heitir froskurinn í Prúðuleikurunum? Hvaða hljóðfæri er meðal annars auglýst með þeim orðum að enginn vilji fá það lánað? Hverrar þjóðar er knattspyrnuundrið Lionel Messi leikmaður Barcelona?

Þetta og margt fleira til í þessari bráðskemmtilegu bók sem ætti að vera til á hverju einasta heimili.

Leiðbeinandi verð: 1.290-.

Uppseld.

Bestu barnabrandararnir-alveg milljón

Bestu barnabrandararnir klikka ekki frekar en fyrri daginn.  Þessi bókaflokkur nýtur alltaf mikilla vinsælda og ekki síður hjá hinum eldri en yngri.  Og þessi bók gefur hinum fyrri ekkert eftir.  Hún ætti að vera til á nánast hverju einasta heimili – já, líka hjá þeim fúlu, enda gætu brandararnir komið þeim í gott skap.

Leiðbeinandi verð: 1.290-.

Uppseld.