Áhugaverð ævisaga Elfríðar

Ein af næstu jólabókum Bókaútgáfunnar Hóla verður ævisaga Elfríðar Idu Emmu Pálsdóttur sem fædd er í Þýskalandi árið 1930. Hún kynntist hörmungum stríðsáranna 1939 – 1945, en hún missti foreldra sína, þrjá bræður, skyldmenni og vini í stríðinu. Það var erfitt fyrir ungling að horfa upp á tvo bræður og móður deyja úr taugaveiki eða næringarskorti á aðeins fjórum dðgum. Loftárásir voru daglegt brauð og dauðinn var mjög nálægur. Ástandið á þessum tíma var afar bágborið, vöruskortur og lítið fæðuframboð. Í lok stríðsins var Elfríð illa farin af næringaskorti t.d. missti hún hárið og var lengi að jafna sig. Hún ákvað að fara til Íslands árið 1949 eftir að hafa séð auglýsingu, þar sem falast var eftir starfskröftum í landbúnaðarstörf. Eitthvað innra með henni hvatti hana til að söðla um og fara burt frá heimalandinu sem var í sárum eftir allar sprengjuárásirnar.  Hún sótti  um vinnu og var ráðin á sveitabæ til eins árs. Hún kynntist mannsefninu Erlendi Magnússyni á næsta bæ og ástin tók völdin – ekki varð aftur snúið heim.  Elfríð hefur verið ötul að pára niður endurminningar sínar og margir hafa hvatt hana til að gefa efnið út. Dóttir hennar, Helga Erla Erlendsdóttir, tók að sér að skrifa bók um lífshlaup hennar og Guðrún Ásgeirsdóttir, tengdadóttir Elfriðar, verður henni til aðstoðar við það.

Páll Gíslason látinn

Þann 1. janúar sl. lést Páll Gíslason læknir, skátaforingi og borgarfulltrúi, 86 ára að aldri.  Á síðasta ári gaf Bókaútgáfan Hólar út ævisögu hans, Læknir í blíðu og stríðu, skráða af Hávari Sigurjónssyni.  Bókin er í senn bæði skemmtileg og fræðandi og vilja Hólamenn þakka Páli fyrir samstarfið við vinnslu hennar og kynningu og senda jafnframt samúðarkveðjur til ættingja hans.

Krimmi

Bókaútgáfan Hólar íhugar nú útgáfu á sakamálaskáldsögu – íslenskri og frumsaminni.  Ef þú lumar á einni slíkri, a.m.k. 150 bls. miðaðar við A-4 stærð, þá sakar ekki að vekja athygli á því á netfanginu holar@holabok.is  Rétt er að taka það fram að ekki er verið að leita eftir smásögum, eða einhverju sem höfundurinn veit að þarf að vinna mun betur.

Gleðileg Jól

Gleðileg jól

Bókaútgáfan Hólar þakkar frábærar viðtökur á útgáfubókunum 2010.  Margir titlanna eru á þrotum hjá útgáfunni s.s. Með létt skap og liðugan talanda – lífssaga Margrétar í Dalsmynni, Það reddast – ævisaga Sveins Sigurbjarnarsonar ævintýramanns á Eskifirði, Pétrísk-orðabók, eftir hinn eina og sanna sr. Pétur Þorsteinsson prest í Óháða söfnuðinum, Spurningabókin 2010 og Í ríki óttans – -örlagasaga Þorbjargar Jónsdóttur Schweizer.  Þá er sáralítið eftir af Feimnismálum Vilhjálms Hjálmarssonar, Bestu barnabröndurunum, Sjónhverfingum-ekki er allt sem sýnist, Undir breðans fjöllum – ljóð og lausavísur Þorsteins Jóhannssonar í Svínafelli, Galar hann enn – gamansögur af Norðfirðingum og nærsveitungum, og Læknir í blíðu og stríðu – ævisögu Páls Gíslasonar læknis, skátaforingja og stjórnmálamanns.  Ennfremur gengur hratt á hina stórkostlegu ljóðabók, Fjallaþytur, en hún inniheldur úrval úr kveðskap hins einstaka Hákonar Aðalsteinssonar og var hún þó prentuð í þokkalegu upplagi í byrjun og síðan endurprentuð!

Enn og aftur kærar þakkir fyrir viðtökur bókanna og gleðileg jól til allra nær og fjær!

Með létt skap og liðugan talanda – lífssaga Margrétar í Dalsmynni

Margrét Guðjónsdóttir í Dalsmynni í Eyjahreppi ákvað níu ára gömul að giftast aldrei.  Sextán ára hitti hún manninn í lífi sínu og eignaðist ellefu börn.  Þess utan höfðu þau hjónin fjölmörg börn í fóstri um skemmri eða lengri tíma svo það var sjaldnast lognmolla á heimili þeirra.  Mörg af þessum börnum segja hér frá ævintýralegri vist sinni í Dalsmynni.

Margrét segist ekki hafa verið penasta pían í sveitinni, en það hélt þó ekki aftur af henni, því hún er þekkt fyrir að hafa skoðanir á öllu og sumt af því hefur hún fellt í ljóðstafi, enda hagyrðingur góður.

Áhugamenn um þjóðlegan fróðleik verða ekki fyrir vonbrigðum með þessa bók.

Leiðbeinandi verð: 5.480-.

Uppseld.

Það reddast – Sveinn Sigurbjarnarson ævintýramaður á Eskifirði lítur um öxl

Sveinn Sigurbjarnarson ferðafrömuður og ævintýramaður á Eskifirði fer sjaldnast troðnar slóðir – ef þá nokkurn tíma.  Hann hefur þvælst um fjöll og firnindi, láglendi og hálendi og hjarnbreiður jöklanna með þúsundir ferðamanna og ævintýrin í þessum ferðum eru mörg og sum býsna skuggaleg. Kappinn lætur sér þó fátt um finnast, enda sagður áræðinn, jafnvel bíræfinn og ennfremur svalur í þess orðs dýpstu merkingu.

Í bók þessari lítur Svenni um öxl og rifjar upp minninagrbrot frá liðinni ævi með aðstoð nokkurra samferðamanna.  Yfir þeim er vitaskuld ævintýrablær, enda sannleikurinn oft lyginni líkastur.

Leiðbeinandi verð: 5.980-.

Uppseld.

Í ríki óttans – örlagasaga hjúkrunarkonunnar Þorbjargar Jónsdóttur Schweizer

Þorbjörg Jónsdóttir Schweizer rekur hér örlagasögu sína.  Sem ung stúlka kynntist hún vistarbandi, en síðar giftist hún Þjóðverjanum Bruno Schweizer og flutti með honum til Þýskalands skömmu áður en seinni heimsstyrjöldin skall á.  Styrjöldin kom nokkuð við fjölskyldu hennar, einkum þó eiginmanninn, sem varað hafði við nasismanum og var því ekki í náðinni hjá nasistum.  Eftir stríðið töldu margir hann hins vegar tilheyra nasistum og því var vandlifað fyrir þennan rólyndismann.

Saga Þorbjargar snertir strengi í brjóstum okkar allra.

Leiðbeinandi verð: 4.480-.

Uppseld.

D-dagur – orrustan um Normandí

Flugmönnum, hermönnum og sjóliðum Bandamanna sem tóku þátt í orrustunni um Normandí leið 6. júní 1944 aldrei úr minni.  Í dagrenningu var stærsti innrásarfloti allra tíma, mörg þúsund fley af öllum stærðum og gerðum, kominn að ströndum Frakklands.  Á ströndum Normandí var þýskt herlið sem fékk síðbúna viðvörun um það sem í vændum var.

Áhugamenn um veraldarsöguna láta þetta meistaraverk ekki fram hjá sér fara. Breski stríðssagnfræðingurinn Antony Beevor hefur unnið gríðarlegt þrekvirki við samantekt þessarar bókar sem vakið hefur mikla athygli um veröld víða.

Leiðbeinandi verð: 5.980-.

Uppseld.

Feimnismál

Í þessari tuttugustu bók sinni fer Vilhjálmur Hjálmarsson á Brekku víða um.  Gluggað er í gömul bréf, kynjamyndir Austfjarðaþokunnar skoðaðar, ferðast er með strandferðaskipum og kynni höfundar af fjölmörgu fólki rifjuð upp, m.a. af Ólafi Thors sem talaði eins vel um framsóknardindlana og hann þorði.

Hvernig fór svo með hvolpinn sem Vilhjálmur neitaði að flytja suður?

Leiðbeinandi verð: 5.480-.

Uppseld.

Útgáfuár: 2010

Af heimaslóðum

Sögusvið þessarar bókar er Melrakkaslétta og byggðakjarninn við Leirhöfn, æskustöðvar höfundarins Níelsar Árna Lund, þar sem hvert nýbýlið reis af öðru um miðja síðustu öld.  Hér segir hann m.a. sögu foreldra sinna, Helgu og Árna Péturs, sem byggðu nýbýlið Miðtún en það var hluti af 60-70 manna samfélagi á Leirhafnarjörð.  Ennfremur er farið með lesendur heim á hvern bæ og sagt frá því fólki sem þarna stundaði búskap af dugnaði og leitaði annarra fanga til að framfleyta sér og öðrum.

Því verður ekki á móti mælt að Níels Árni Lund hefur með þessari bók unnið mikið þrekvirki við að halda til haga þjóðlegum fróðleik af mannlífi fólks við ysta haf.

Leiðbeinandi verð: 5.980-.

Uppseld.