Einn léttur!

Guðrún var reiðari en nokkru sinni fyrr.

„Þú ert fífl,“ sagði hún við mann sinn. „Þú hefur alltaf verið fífl og verður alltaf fífl. Ef það væri haldin keppni um það hver væri mesta fíflið myndir þú tvímælalaust lenda í öðru sæti!“

„Hvers vegna í öðru sæti?“ spurði maður hennar.

„Vegna þess að þú ert fífl!“

Svarfaðardalsfjöll

Svarfaðardalur er að sumum talinn fegursti dalur í byggð á Íslandi.  Að einhverju leyti skapast það af því að dalurinn og afdalur hans eru umkringdir sérlega fallegum en jafnframt hrikalegum fjöllum.  Þessi fjallgarður er lítt kannaður en árið 1995 ákváðu fjórir göngufélagar að ganga þennan fjallahring allan.  Hreppamörkin umhverfis Svarfaðardal eru um 120 km löng og telja 75 tinda með jafnmörgum skörðum.  Það tók félagana fimmtán göngudaga á átta árum að ljúka verkefninu.  Í bókinni er ferðum þeirra félaganna eftir vatnaskilum og fjallseggjum lýst í máli en einnig með 138 myndum og 18 kortum.  Nöfn flestra tinda eru færð inn á myndirnar og skörð eru nafnkennd á kortunum.

Höfundur bókarinnar er göngugarpurinn og náttúrufræðingurinn Bjarni E. Guðleifsson á Möðruvöllum í Hörgárdal.  Hann hefur stundað fjallgöngur um árabil og skrifað um það bók, Á fjallatindum, sem var hið vandaðasta verk í alla staði.  Þessi bók er ekki síðri, hún er afar smekkleg í alla staði og kjörgripur þeirra sem áhuga hafa á fjallgöngum og náttúru Íslands.

Leiðbeinandi verð: 4.980-.

Uppseld.

Einn í tilefni af sumarkomunni!

Fjóla var að leita sér að flottum sportbíl og fór á bílasöluna. Hún gekk á milli Rollsa og Benza og þegar hún sá guðdómlegan Lexus staðnæmdist hún og strauk yfir hann með hendinni. Um leið leysti hún óvart vind svo glumdi í. Hún leit skömmustuleg í kringum sig og vonaði að enginn hefði heyrt í henni. En þegar hún sneri sér við sá hún að sölumaður stóð fyrir aftan hana.

„Góðan dag, get ég aðstoðað?“ spurði hann kurteislega.

„Hvað kostar þessi … ehhhh … dásamlegi bíll?“ stamaði Fjóla.

„Frú mín góð!“ sagði sölumaðurinn. „Ef þú prumpar við það eitt að snerta hann hvað gerist þá þegar þú heyrir verðið!“

Gleðilegt sumar!

Bókaútgáfan Hólar óskar öllum gleðilegs sumars og reyndar einnig gleðilegra páska, því örstutt er í þá.  Og af því að nú er gaman, þá flýtur hér einn laufléttur með:

Ibn Saud ben Alekh var virtur og mikils metinn maður í þorpinu sínu. Dag nokkurn var hann viðstaddur kameldýrauppboð á torginu þegar hann fékk afar sáran magaverk. Áður en hann vissi af hafði hann leyst vind með miklum látum. Hávaðinn var mikill og lyktin það megn að þorpsbúar færðu sig fjær og störðu í forundran á hann. Ibn Saud skammaðist sín svo mikið að hann fór beinustu leið heim, pakkaði niður eigum sínum og yfirgaf æskustöðvarnar. Hann flakkaði um heiminn og þegar aldurinn færðist yfir hann fékk hann löngun til að sjá heimabæ sinn aftur. Hár hans var orðið sítt og grátt og sama mátti segja um skeggið sem náði honum niður á bringu. Hann var viss um að enginn myndi þekkja hann eða tengja hann við þetta auðmýkjandi atvik á torginu. Þegar hann kom inn í þorpið fór hann beint á torgið og sá að þar var búið að byggja stóra og fallega mosku. Ibn Saud stoppaði ungan mann og sagði við hann:

„Friður sé með þér, sonur sæll. Gætir þú sagt mér hvenær þessi moska var fullbyggð?“

„Látum okkur nú sjá,“ sagði maðurinn hugsandi. „Já, það hefur verið sjö árum, fimm mánuðum og tuttugu og tveimur dögum eftir að Ibn Saud rak við á torginu.“

Ný bók!

Bókaútgáfan Hólar er þessa stundina að fá í hús glænýja bók eftir Arnþór Gunnarsson, sagnfræðing frá Hornafirði.  Bókin heitir Á afskekktum stað og inniheldur frásagnir sex Austur-Skaftfellinga sem segja má að ferðist með okkur í tíma og rúmi.  Sjá nánar um bókina hér til hægri.

Rétt er að geta þess að útgáfuveisla vegna úrkomu bókarinnar verður haldin í Pakkhúsinu á Hornafirði á skírdag og eru allir velkomnir þangað.  Veislan hefst klukkan 14 og þar verður bókin seld á tilboðsverði, kr. 2.500-.

Á afskekktum stað

Bókin Á afskekktum stað er byggð á samtölum Arnþórs Gunnarssonar sagnfræðings við sex Austur-Skaftfellinga. Bókinni er ætlað að gefa lesendum tilfinningu fyrir sögu og þróun mannlífs í Austur-Skaftafellssýslu frá því á árunum milli stríða fram til dagsins í dag. Viðmælendur höfundar eru hjónin Álfheiður Magnúsdóttir og Gísli Arason, sem fædd eru og uppalin á Mýrum, Ingibjörg Zophoníasdóttir á Hala í Suðursveit, Þorvaldur Þorgeirsson, sem í áratugi gegndi verkstjórn í bandarísku ratsjárstöðinni á Stokksnesi, og feðgarnir Sigurður Bjarnason og Einar Rúnar Sigurðsson á Hofsnesi í Öræfum. Á afskekktum stað er því eins konar ferðalag í tíma og rúmi.

Leiðbeinandi verð: 3.500-.

Uppseld.

Einn góður!

Jæja, elskurnar mínar.  Ég hef stundum laumað gamansögu á þessa síðu og vonandi hefur það mælst vel fyrir.  Hér er ein í safnið:

Unga móðirin var hjá geðlækninum.

„Þú hefur allt of miklar áhyggjur af barninu þínu,“ sagði hann. „Ég ætla að skrifa upp á róandi lyf sem þú þarft að taka tvisvar á dag. Komdu svo til mín aftur í næstu viku.“

Viku seinna kom konan og geðlæknirinn spurði:

„Hafa lyfin haft einhver áhrif?“

„Já,“ svaraði konan. „Þau hafa gert algjört kraftaverk.“

„Hvernig hefur svo barnið þitt það?“

„Hverjum er ekki sama!“

Séra Jón Bjarman látinn

Séra Jón Bjarman, fanga- og síðar sjúkrahúsprestur, lést 17. mars sl., 78 ára að aldri.  Ævisaga hans, Af föngum og frjálsum mönnum, kom út hjá Bókaútgáfunni Hólum árið 1999 og var fyrsta ævisagan af mörgum sem Hólar hafa gefið út.  Þá hafa Hólar gefið út tvær ljóðabækur eftir séra Jón, Undir fjallshlíðum og Stef úr steini.

Bókaútgáfan Hólar þakkar séra Jóni Bjarman ánægjulegt samstarf og sendir samúðarkveðjur til eiginkonu hans, Hönnu Pálsdóttur, og annarra ættingja.

Einn bráðsmellinn

Þrír ungir piltar fengu lélegar einkunnir í kynfræðslu. Jói fékk D+, Gummi D- og Nonni fékk F.

„Einn daginn fær tíkin sko að finna fyrir því,“ sagði Jói bálreiður og var að tala um Guðríði kennslukonu.

„Já, við náum henni og klæðum hana úr öllum fötunum,“ sagði Nonni.

„Já, og svo skulum við sparka í punginn á henni,“ sagði Gummi.

Einn góður!

Flugvél hóf sig til lofts frá Akureyrarflugvelli. Þegar vélin var komin upp í rétta flughæð heyrðist í flugstjóranum:

„Ágætu farþegar. Þetta er flugstjórinn sem talar. Velkomin um borð, ég vona að ferðin til Reykjavíkur verði þægileg. Veðrið er gott og engin ókyrrð í lofti … Ó, NEI!“

Þögn.

Eftir smástund heyrðist aftur í flugstjóranum:

„Ágætu farþegar. Ég vona að ég hafi ekki hrætt ykkur hérna áðan. En á meðan ég var að tala hellti aðstoðarflugmaðurinn heitu kaffi í kjöltuna á mér. Þið ættuð að sjá buxurnar mínar að framan.“

„Það er ekkert,“ tautaði farþegi við sessunaut sinn. „Þú ættir að sjá mínar að aftan.“