Útgáfuteiti

Næsta fimmtudag, þann 21. nóv., klukkan 17:00 verður lesið upp úr bókinni HÚMÖR Í HAFNARFIRÐI í Eymundsson-búðinni við Strandgötu.  Þar mun höfundurinn, Ingvar Viktorsson, fara á kostum eins og honum einum er lagið og fleiri munu auk þess stíga fram og segja gamansögur af Hafnfirðingum.  Af nógu er að taka.  Þeir sem það vilja geta svo fengið bókina áritaða.

Láttu sjá þig!

Von-saga Amal Tamimi

Amal Tamimi er fædd og uppalin í Jerúsalem í Palestínu. Hún var 7 ára þegar stríðið skall á, 13 ára var hún fangelsuð af Ísraelsmönnum vegna grjótkasts, 16 ára var hún gift. Árið 1995 flúði hún heimilisofbeldi eiginmanns síns og fór með börnin sín fimm til Íslands. Flóttinn var ævintýralegur og Amal hræddist um líf sitt. Nafn Amal merkir von. Von Amal hefur ávallt verið að komið sé fram við hana og alla aðra eins og manneskjur. Af virðingu og væntumþykju.

Leiðbeinandi verð: 5.980-.

Húmör í Hafnarfirði

Smávaxnir Hafnfirðingar með Leif Garðars, Þóri Jónsson, Halla í Botnleðju, Leif Helga, Viðar Halldórs og Óla Dan bera höfuðið hátt þrátt fyrir smæðina. Hörður Magnússon gáir til veðurs. Gísli pól umkringir mann. Kennarar við Flensborgarskólann skreppa í bíó og hafa með sér rauðvínskút.  Þórður Þórðarson boðar „strand á Dansgötunni“. Gunnar Rafn Sigurbjörnsson lýsir starfsmönnum Hafnarfjarðarbæjar. Gummi Valda mætir draghaltur til vinnu. Hildur Guðmundsdóttir biður nemanda sinn að bíta á jaxlinn. Maggi Óla fer á sjó. Geir Gunnarsson neitar. Adolf Björnsson týnist og Ingileif Ólafsdóttir pantar hangikjöt.

Leiðbeinandi verð: 2.980-.

Skagfirskar skemmtisögur 3 – Enn meira fjör!

Gamansemi Skagfirðinga er óþrjótandi sagnabrunnur. Hér eru óborganlegar sögur af m.a. Bjarna Har, Halla í Enni, Friðriki á Svaðastöðum, Dúdda á Skörðugili, Bjarna Marons, Pálma Rögnvalds og Álftagerðisbræðrum og sveitungum þeirra. Einnig af Jóni Drangeyjarjarli, Birni í Bæ, Ýtu-Kela, Binna Júlla, Jóhanni í Kúskerpi, Marka-Leifa, Sigga í Vík, Gunna Rögnvalds, Siggu á Eyrarlandi og fyndnum Fljótamönnum. Eru þá sárafáir nefndir af þeim sem hér stíga á stokk.

Leiðbeinandi verð: 2.980-.

Sir Alex – hinn magnaði Ferguson-tími hjá Manchester United 1986-2013

Einstök saga Ferguson-tímans hjá Manchester United er viðfangsefni þessarar bókar og ekki vantar stórsjörnurnar: Cantona, Schmeichel, Solskjær, Keane, Ronaldo, Rooney, Beckham, Ferdinand,  Scholes. Vidic, Giggs og Van Persie og eru þá fáir nefndir.  Á bak við þetta stóð svo arkitektinn að öllum ævintýrunum, Sir Alex Ferguson.  Frábær fótboltabók – stútfull af snilldartilþrifum, ruddalegum tæklingum, rauðum spjöldum og alls kyns fótboltakryddi.

Leiðbeinandi verð: 5.980-.

Afmæli á Grund

Grund fagnaði 91. árs afmæli fyrir stuttu af var Helena Eyjólfsdóttir sótt norður til Akureyrar til að skemmta vistmönnum, starfsmönnum og gestum Grundar af því tilefni.  Á eftirfarandi slóð má sjá brot úr veislunni (ath. söngur Helenu er aftarlega á slóðinni): http://grund.is/index.php/8-frettir/61-helena-eyjolfsdottir-afmaelisgestur

Allir krakkarnir 2

Þessi bók inniheldur hefðbundið nafnarím, bæði kærleiksríkt og kvikindislegt, vel á sjötta hundrað talsins.  Fyrri bókin, Allir krakkarnir, kom út árið 1993 og seldist fljótlega upp.  Hér er loks komin út ný bók með enn meira nafnarími. Samkvæmt hefðinni hefst meirihlutinn á orðunum „Allir krakkarnir“ og svo þarf rímið að vera sterkt og einnig þarf húmorinn oftar en ekki að vera svartur og kaldhæðinn.

Hér er hægt að skoða sýnishorn af bókinni: issuu.com/gunnarkr/docs/allir_krakkarnir2-synishorn

Leiðbeinandi verð: 2.480-.

100 ára saga Kaupfélags Héraðsbúa

Kaupfélag Héraðsbúa, sem stofnað var árið 1909, á sér merka sögu. Það var á löngu tímabili burðarás í austfirsku atvinnulífi með mikla starfsemi bæði á Héraði og niðri á fjörðum en með breyttum viðskiptaháttum og samfélagsþróun í lok 20. aldar tók að fjara undan því. Hér rekur Jón Kristjánsson, fyrrum ráðherra,  aldarsögu þessa merkilega samvinnufélags og tekur ýmsa króka til að gera frásögnina jafnt skemmtilega sem fræðandi.

Leiðbeinandi verð: 7.980-.

Stuð í Súlnasalnum

Gullin ský er heiti á ævisögu söngkonunnar vinsælu, Helenu Eyjólfsdóttur.  Í tilefni af útkomu hennar mun Helena á laugardagskvöldið næstkomandi stíg á svið ásamt stórhljómsveit í Súlnasal Hótel Sögu og rifja þar upp glæstan söngferil sinn í tali og tónum.  Tónleikarnir hefjast klukkan 21 og síðan verður ball á eftir.  Bók hennar verður til sölu á staðnum og því geta menn sótt bæði næringu til sálar og líkama í Súlnasalinn á laugardagskvöldið.

Ótrúlegt en satt!

Það er erfitt að trúa því, en þar sem kirkjubækur á Jökuldal ljúga ekki þá liggur það ljóst fyrir að hagyrðingurinn og kennarinn, Ragnar Ingi Aðalsteinsson frá Vaðbrekku, verður sjötugur þann 15. janúar næstkomandi.  Af því tilefni hafa vinir hans og velunnarar ákveðið að gefa út vandað afmælisrit honum til heiðurs.  Það verður að stærstum hluta byggt á úrvali úr ljóðum hans, allt frá grafalvarlegum kveðskap yfir í gamansaman.

Aftast í ritinu verður heillaóskaskrá.  Þar geta þeir sem gerast áskrifendur að því fengið nafnið sitt birt og um leið sent afmælisbarninu kveðju. Verð þess er kr. 5.480- og er sendingargjald innifalið. Hægt er að panta bókina í síma 557-5270 og í netfanginu holar@holabok.is en útgefandi hennar er Bókaútgáfan Hólar.

F.h. ritnefndar

Þórður Helgason

Sigurður Sigurðarson

Bjarki Karlsson