• Molar

  • 27/08/2024
    Hólabækur ungast út! (#)
    

    Bækurnar frá Bókaútgáfunni Hólum streyma nú hver af annarri úr prentsmiðjunni og auðvitað er þeim dreift strax í bókabúðir. Unglingabókin ÓLGA var fyrsta bók ársins, síðan kom göngugarpabókin KINNAR- OG VÍKNAFJÖLL, þá TIL TAKS - ÞYRLUSAGA LANDHELGISGÆSLU ÍSLANDS - FYRSTU 40 ÁRIN, og nú síðast FIMM AURAR - Fyndnustu brandarar í heimi! Fleiri eru svo væntanlegar áður en langt um líður, m.a. bækur um knattspyrnu, hjátrú, síld, fugla, mest notaða orðasamband í heimi (já, hvert skyldi það nú vera?) og Drottninguna í Dalnum, fyrir nú utan bráðskemmtilegt smásagnasafn og spurningabók. Þið ættuð því endilega að fylgast með væntanlegum útgáfufréttum á holabok.is.

  
  
  
  • 25/04/2023
    Fyrsta bók ársins 2023 (#)
    

    Þá er fyrsta Hólabók ársins 2023 komin út. Hún heitir Hormónar og fleira fólk - Missannar sögur frá síðustu öld, er eftir Halldór Ólafsson, og saman stendur af fjölmörgum smellnum sögum og vísum. Er ekki tilvalið að fara brosandi og jafnvel skellihlægjandi inn í sumarið?

  
  
  
  • 12/01/2022
    Anna Kristine látin (#)
    

    Anna Kristine Magnúsdóttir Mikulcákova lést nú í ársbyrjun. Bókaútgáfan Hólar gaf út tveir bækur eftir Önnu, Milli mjalta og messu, sem byggði á samnefndum og vinsælum útvarpsþáttum hennar, og Með létt skap og liðugan talanda, sem er ævisaga Möggu í Dalsmynni. Báðar bækurnar nutu vinsælda, enda var Anna fundvís á viðmælendur og kunni þá list að leita eftir því markverða og segja þá sögu vel og heiðarlega.  Blessuð sé minning Önnu Kristine.

  
  
  
  • 26/12/2021
    Fugladagbókin 2022 (#)
    

    Margir hafa þann skemmtilega sið að skrá hjá sér eitt og annað í dagbækur. Senn lýkur þessu ári og því viljum við Hólamenn minna á Fugladagbókina 2022, sem er í rauninni miklu meira en hefðbundin dagbók. Þar er að finna fróðleik um 52 fugla - einn fyrir hverja viku, marga svokallaða flækinga hér á landi, auk glæsilegra mynda af þeim. Fyrir fuglaáhugafólk er tilvalið að punkta hjá sér ýmislegt í bókina varðandi fugla, s.s. hvenær þessi fugl sást og þá hvar. Svo má vitaskuld nota dagbókina eins og hverja aðra og punkta hjá sér hvaðeina sem gott er að eiga skráð. Bókin er mjög hentug og t.d. fyrir fuglaáhugamenn má nefna að hún fer einkar vel í tösku. Því er tilvalið að grípa hana með sér í fuglaskoðun.

    Fugladagbókin 2022, sem er eftir Sigurð Ægisson, er sannkölluð gersemi á meðal dagbóka!

  
  
  
  • 03/10/2021
    Instagram (#)
    

    Bókaútgáfan Hólar er mætt á Instagram. Þú finnur hana undir bokautgafan_holar. Endilega skelltu í "add" og fylgstu með skemmtilegum innslögum!

  
  
  
  • 18/04/2021
    Papa Jazz allur (#)
    

    Um miðjan þennan mánuð lést Guðmundur Steingrimsson - Papa Jazz. Hann var afar snjall trommuleikari og einn af brautryðjendum djassins hér á landi; lék með fjölda hljómsveita og kenndi ýmsum þá list sem vandaður trommuleikur er.

    Árið 2009 kom út hjá Bókaútgáfunni Hólum ævisaga Guðmundar og ber hún einfaldlega heitið Papa Jazz. Það var Árni Matthíasson sem skráði og má fullyrða hér og nú að samvinna þeirra félaga hafi orðið til þess að margvíslegur fróðleikur um tónlistarlífið á Íslandi varðveitist um ókomin ár og þá ekki síst það sem snýr að jazzinum.

    Undirritaður kynntist Guðmundi vel á þessum árum og ræddum við um heima og geima, meira að segja um knattspyrnu, en Papa Jazz var stuðningsmaður Leeds og fylgdist ágætlega með boltasparkinu. Þess utan var hann mikill sögubrunnur um menn og málefni og var virkilega gaman að hlusta á hann segja frá. Hann kunni óteljandi sögur, fæstar máttu auðvitað fara eitthvað lengra, en hann sagði þær og aðrar einnig af slíkri snilld að unun var af.

    Blessuð sé minning Papa Jazz.

    Guðjón Ingi Eiríksson.

  
  
  

• Hólar á Facebook

• Póstlistaskráning

• Leita á þessari síðu

Um Hóla

BÓKAÚTGÁFAN HÓLAR var stofnuð í upphafi tíunda áratugar síðustu aldar af Jóni Hjaltasyni, sagnfræðingi og rithöfundi á Akureyri. Fyrstu útgáfubækur hennar voru Nonni og Nonnahús og Hernámsárin á Akureyri og Eyjafirði, báðar eftir Jón.

Nokkru eftir útgáfu þessara bóka hófst samvinna þeirra Jóns og Guðjóns Inga Eiríkssonar, kennara, þáverandi knattspyrnuþjálfara og bóksölumanns, sem búsettur er í Reykjavík. Ráku þeir bókaútgáfuna saman fram á árið 2006, en þá keypti Guðjón hlut Jóns í henni og hefur rekið hana einn síðan – að vísu með aðstoð margra góðra aðila.

Bókaútgáfan Hólar hefur gefið út á þriðja hundrað titla og kennir þar ýmissa grasa. Hún hefur þó einkum staðið fyrir útgáfu fræðirita, bæði frumsaminna og þýddra. Af þeim frumsömdu má nefna Sögu sjávarútvegs á Íslandi I-III, Sögu biskupsstólanna og Norðfjarðarsögu I og II. Þau þýddu innihalda meðal annars bækur breska sagnfræðingsins Antony Beevor, Fall Berlínar, Stalíngrad, Njósnari í Þýskalandi nasista og Orrustan um Spán.

Þá hefur bókaútgáfan verið öflug í útgáfu á sviði gamanrita og hafa til að mynda þrjár gamansögubækur af íslenskum prestum orðið feikilega vinsælar. Þær heita Þeim varð á í messunni, Þeim varð aldeilis á í messunni og Amen (eftir efninu). Íþróttabækur hafa ennfremur skipað stóran sess hjá Hólum, einkum um knattspyrnu og þar má nefna Rauðu djöflana (sögu Manchester United), Rauða herinn (sögu Liverpool), Sögu Chelsea, Stoke City í máli og myndum, Bestu knattspyrnulið Evrópu, Alltaf í boltanum og nú síðast Sá besti! – Cristiano Ronaldo. Annars hafa útgáfubækur Hóla spannað flest svið bókmennta og mun svo verða áfram.

Bókaútgáfan Hólar